Enamdru yasoma ye taarifa yahe wizara yahe ze habari zapvondze yahe tareh 29 ya avril yapvira, harambushiwa nawuka ye sirkali yiredjeyi dingoni harimwa ze anzma zahayo zawu haraya dingohi ofudhuli ufanyiwawo yentsi uhusu lesuala la Maore.
Ntsihu ncashi kabla yapvo ye sirkali ya Komor yika iharaya kabisa omtolwa waho wa Komor harimwa lesiwa la Maore, habari pvoko ika yinika twamaya owumati wa Komor uka hwenda ye Maore ngayidjo uredjeyi. Osiku iyo, rais Sambi harudi haremewa kotsi la kweli.
Amma ntsihu ncashi banda yapvo (tareh 14 ya avril) udjumbe waki Farantsa uwaswili hunu masiwani. Udjumbe wawandru wayili : mdzima, Remi Maresho, nde ahli mashawiri waraisi Sarkozi wa Farantsa uhusu ze habari za Afrika, ewapvili, Alin Moro, balozi mdjumbe uhusu zehabari sa mshirikiyano harimwa ye baharilhindi.
Lera 24 za msafara, ko mdru hunu masiwani yadjuwa zambishiha nawo wonana ne waziri wahe ze habari zapvondze, ewahe mahakama na raisi wahe dawula. Harimwa ze djanibu zombili waka hama wandru wameza mzinga. Kapvatsi mtrangazidji yadjuwa zambishiha.
Baanda mifumo 2 upvira, ye ntrada yifuha. Hayina yasoma ye tarifa yahe wizara yahe zehabari zapvondze ya Komor helewa ukaya banda ye Komor yawahi yapuwa ngayo mbili henda usoni harimwa lesuala la Maore, yirudi yipuwa ngayo kume zauredjeyi dingoni djuya he lesuala linu.
Zeviza, hari, ngazidjo do tolwa. Andopvi nde djonikiwa. Hari ndo wandru wahe diplomasi, nowafanawo nawo. Wanu kwadja paro ziliwa zevisa zinu. Owahezadji nowandru wasipori wona nafasi yahenda Maroe. Zinu tsindizo owa Komor waka ulinda. Wala kwana udjuwa uhutadjiya djama ndizo: Maore ndo hawo, kapvatsi shartwi na mipaka nge wadjuwe wende yiho.
Ye tarifa yahe tareh 29 ya avril yonesa umavu besheleya laheya yandziha. Wadiwaza zayidi ya alifu 4 zawa Komor wafiya hobarini ya Maore hapvo ritso utsha rambe naza saya na saya.
Ezadjiri hindri zaredjeza ye madhwamana dingoni? Ezaparihana hindri? Angapvo zahulindiya itso nde Maore yiredjeyi banda mahadisi yahe ze djanibu zontsi zapasiwa no mhima wunu?
Ezadunga yapvo ngarizi djuwawo : randzi ndo mfumo raka nuwo, ha meli na aviyo, owa Komor ngwa hupvwawo Maore nodja wevuriziwa Ndzuwani sawa no usiku yila Mohamed bakar yaka yapvo. Amma yeye, haka ulipvwa kiyasi ya alfu 3 fedha yashi Komor, hayina hitswa sha mwanadamu yadumbiziwa Maore. Lelo karitsu djuwa isho wahundrawo owalo yapvo. Amma ritrilwa twamayani yawuka mahadisi yadaradja yadjuwu ngadjo udjimliha bayina yahe madhwamana wa Komor no wa Farantsa. Tsihaba ngaridjo ukantsi sine mzumngu, rihadisi naye, labda ambeseye rile pvadzima naye. Tsi ntiti, tsi ndemevu pvoranikiwa twamaya ne mzungu.
M. Hassani
Muruwa. Said Abas Dahalan hamara yasaya raisi wahe shama
Ye parti Muruwa yi redjeza Said Abas Dahalan harimwa ze dhwamana zahahe zawutrendeya ye shama shinu hata uwaswili ye kongrsi yidjo udunga. Zinu nde zalawana ne le kongresi lahe shama shinu lakaza kifu yemfu mbili yadjuzi yiho Itsandra mdjini.
Ulawana ne msomadji rasmi wahe shama, Mhusini Hasani Barwani, ze anzma za he le kongresi linu ndo utriya shiwuno ye parti harimwa ye miva piya handisa randzi ndo harimwa ze bavu uwasili ye daradja ya twayifa.
Mhusini Hasani Barwani hayeleza uka ze faliki zahe shama sha Muruwa ndo mhezo djuwu ye mayesha yahe Mkomori amma yelelo kayitsu ladhimu wandru wabaki harumwa siyasa ndruvu yitso upiha yitso upvahuwa.
Ye msomadji wahe shama sha Muruwa hayeleza uka omkombolwa wahe lesiwa la Ndzuwani ladhima uzaye tartibu za nyumeni zawu baliya ye shama hapvo yaka lelo yenafasi yibuha, banda owakutruzi uroswa mbiyo, ili ye mayesha ya Ndzuwani yadjuwe yendeleye kawayida. Hazinu, Mhusini H. Barwani hadjuza uka Bakar Abdu, wakala wahe lesiwa la Ndzuwani harumwa le bavu la Mtsamdu harendeha mwana shama wahe Muruwa naye nge kandida wahe Muruwa harumwa ze voti kabili zahe raisi wahe lesiwa la Ndzuwani.
Uhusu omkayontsi washi Komor pvoko humkiniha urendehe banda ze voti za Ndzuwani ufanyiha, ye Muruwa ngedjo nesawo mwafaka nuwo. Omwafaka uwo nguwo howu pande wahuka le trengwe linu linyamiliye hususwan yemasuala yahusu mayesha no utumi badala la uhafiliha na masuala yasiyasa. Ye Muruwa kayitsu haraya uka pvatsi djiri mahadisi yaki siyasa amma ngayo wonawo mwafaka uka hayina trongozi lasiyasa lidjo ka urendeha litsi badili ze nuktwa zahe shariya uhusu omzunguliyo wahe she hiri sha uraisi harimwa yemasiwa.
He namna, ngayiri yelewawo uka, Said Abas Dahalane ne Muruwa ngwa wonawo namna ndzima no wendji wahe ma dhwamana wa siyasa ikawo ngwa tuhumuyo ye shariya mshindzi nawuyi amma nashi baki yehali shiliyo ili uruhusu ye Mwali yidje yihondrane ne sabiki yahayo omwaha 2010, yani harumwa kiyasi ya mezi 24 pvanu.
M.H |